德甲班霸拜仁慕尼黑周六凌晨將會作客鬥哈化柏林；拜仁周中聯賽意外失分，今場肯定會打醒十二分精神，好彩球隊近期作客表現夠勁，面對實力欠奉嘅哈化柏林，拜仁有力反客為主，讓球盤拜仁讓球半/兩球，照捧上盤。

（Now 670周六凌晨2時30分直播）

拜仁啱啱喺周中快車失分，1比1遭作客嘅奧格斯堡逼和，搞到新帥尼高高華上任後喺各項正式賽事所保持嘅7連勝紀錄斷纜。不過咁嘅結果絕對係呢位克羅地亞教頭咎由自取，皆因拜仁明顯低估咗對手實力，上仗收起咗羅拔利雲度夫斯基、占士洛迪古斯同謝路美保定等主力，連阿拉巴、堤亞高艾簡達拿都只係以後備身份上陣。今場拜仁痛定思痛，為免進一步失分，肯定精英盡出，務求攞齊3分。

作客一樣有鑊氣
周中同樣失分嘅仲包括哈化柏林，呢支首都球隊上仗1比3不敵雲達不來梅，慘吞聯賽首場敗仗。哈化柏林板櫈深度根本冇得同聯賽一哥拜仁比較，相隔3日又要踢硬仗，對哈化球員嘅體能絕對係莫大挑戰。況且拜仁今季作客表現拍得住主場，計埋聯賽同盃賽，今季4仗作客大獲全勝，其中3次都贏對手2球或以上，今場有望乘勢追擊，上盤唔好錯過。