多蒙特新帥法夫爾領軍已經全面上力，上場炒「紐」做咗大贏家，依家本錢雄厚，根本唔使刻意留力歐聯，乘勝追擊有力再贏一向忌佢哋三分嘅利華，平手盤一於撐多蒙特啦！

（on.cc東網周日凌晨零時30分直播）

利華古遜季初出閘脫腳，德甲開咧3連敗輸到捧場客失魂，雖然近期成績有起色，喺歐聯同德甲合共取得3連勝，但贏嘅只係盧多格德斯、緬恩斯、杜塞爾多夫等弱旅，而且贏波過程絕對唔輕鬆，前兩場更加係大話夾好彩，雖然新星夏維斯同首席射手禾蘭近期肩負起入波重任，但陣中兩位最具級數嘅發電機里安拜尼同祖利安白蘭特仲未撻着，令佢哋嘅進攻組織頻頻斷纜，連仗遇弱都佔唔到明顯優勢，今晚遇上弗爆嘅「蜜蜂兵團」幾難樂觀。

近11次作客利華古遜僅1敗
相反，多蒙特喺新帥法夫爾調教下愈戰愈勇，啱啱至喺主場以7比0狂數紐倫堡，取得球會近32年來最大勝仗，前線多點開花、穿花蝴蝶式嘅互傳進攻組合流暢悅目，經常可以輕易撕破對手防線，隊長馬高列奧斯表現光芒四射，法夫爾又放膽起用後備同新人，依家陣中有接近20名當弗猛將爭位踢，唔憂下周中主場對摩納哥嘅歐聯賽事，法夫爾最頭痛嘅只係點樣令每位戰將得到一定上陣時間，維持隊內熾熱同融洽嘅氣氛。

事實上，多蒙特喺對賽往績一直佔上風，近3次對賽兩勝1和共轟入11球，包括最近1次喺今年4月主場大炒利華4蛋，近11次到訪利華古遜嘅拜耳球場更只輸1次，今晚作客唔使讓波確係筍盤。