C朗孭飛演反擊戰
歐聯16強次回合大戰，祖雲達斯主場出擊鬥里昂，意甲班霸祖雲達斯喺2月尾舉行嘅首回合作客輸0比1，但時移世易，佢哋喺意甲重開後，經過近2個月比賽目前處於托弗狀態；反觀里昂近5個月只踢過1場正式比賽，狀態成疑，加上祖雲達斯近6場歐聯主場取得5勝1負，有力反勝晉級，祖記讓1球要上盤。

（Now 644、有線661及601台周六凌晨3時直播）

意甲及法甲同樣於3月停擺，但意甲喺6月中就復賽，祖雲達斯順利實現9連冠霸業，佢哋近2場輸波，只因已提早成為聯賽冠軍，明顯留力今場大戰，特別係上場煞科戰，教練沙利收起C朗、保羅戴巴拿等多位主力，養精蓄銳迎戰里昂。

祖記喺意甲已難逢敵手，球隊最大目標係奪取歐聯冠軍，佢哋喺歐聯經驗豐富，擅踢逆境波，最佳例子莫過於上屆16強首回合0比2不敵馬體會，次回合大勝3比0晉級。祖記今次首回合僅輸0比1，反勝機會仍高，更何況祖雲達斯近14次主場對法國球隊，取得11勝3和理想成績，今場有力贏到里昂2球。

里昂少比賽冇狀態
法甲因為新冠肺炎腰斬，里昂近5個月只曾踢過1場正式賽事，就係8月1日法聯盃決賽對聖日耳門，結果打和0比0。最終里昂射輸12碼失冠，士氣受損，加上里昂球員久疏戰陣，狀態亦比唔上祖記球員。況且里昂近5次作客對意大利球隊，只得1和4負，過去6次踢歐聯16強都被淘汰，所以就算佢哋今次首回合贏1球都好牙煙。