「6分波」穩陣至上
今午澳職獨腳戲，西部聯於中立場火併西悉尼流浪者。兩軍同分兼仲有機會爭踢季後賽，為免喺呢場「6分波」輸畀競爭對手，必定穩陣至上，尤其係西流初段例保守，半場和值得再追。

（myTV Gold 302、Now 639、有線665及615台周五下午5時30分直播）

西部聯目前只排第8位，同第6位嘅季後賽末席距離睇落幾遠，但由於賽程安排關係，實質西部聯比前列球隊踢少2場至3場，因此只要自己生性，季後賽命運依然掌握喺自己手中。西部聯喺復賽後只踢過2場，取得1勝1負成績，球員比賽狀態或略為輸蝕，而且貝利沙、迪亞文迪等老將偏多，表現較為慢熱，何況仲有班頓咸美頓等3將缺陣添。

停擺前對碰兩開半場和
西流上場以1比3不敵珀斯光輝後，累積30分排第9位，同今仗對手西部聯同分但踢多2場，仍有機會躋身季後賽，面對直接競爭對手，梗係不容有失，希望穩中求勝。西流確係踢法保守，特別係比賽初段，近5場聯賽有4次開半場和，包括3場半場開0比0，尤其德國前鋒尼古拉梅拿腦震盪初愈，未必能夠擔正，加上今季聯賽停擺前2鬥西部聯，同樣開出半場和，雙方都有顧忌之下，初段唔敢輕舉妄動，半場和不妨追多鋪。