阿休中柱宴客再入波
史雲斯射手安祖阿休經歷中柱、射失12碼及一箭定江山，喺英冠升班附加賽首回合，帶領「天鵝」以1比0擊敗賓福特（黑衫），賓福特有後衞域高亨利紅牌被趕出場，喺周四凌晨嘅次回合賽事要停賽，史雲斯近6場聯賽作客3勝3和，賓福特要反先似乎有啲難度。

雖然史雲斯喺聯賽最後一刻先至攞到附加賽資格，但今場踢來不落下風，控球率達57.8%，14次射門中7次，相反賓福特12射只得3中。今場射手安祖阿休做主角，呢名加納射手上半場末段，接應進攻左路角球頭槌攻門，對方門將已經冇晒反應，點知個波就中柱唔入。

賓福特後衞域高亨利領紅
到咗下半場18分鐘，史雲斯獲得12碼，安祖阿休主射被撲出，以為佢黑氣纏身，但3分鐘後賓福特後衞域高亨利侵犯史雲斯球員直紅出場，「天鵝」喺人多蝦人少之下壓住嚟攻，終於喺82分鐘有收獲。安祖阿休喺右路發動攻勢，同隊友干拿加歷查及積富頓極靚合作嘅三角空中短傳，安祖阿休半窩利抽入，助球隊首回合以1比0領先。

自1947年從未於頂級聯賽亮相嘅賓福特，次回合雖然有主場之利，但史雲斯近6場聯賽作客表現穩定，獲3勝3和不敗成績，只要能夠保持不敗，就能夠晉級附加賽決賽。