英超最後一輪，除咗神射手之外，金手套之爭同樣激烈，曼城門神艾達臣摩拉斯，同般尼門將尼克普比同樣保持15場清白之身，要到最後呢輪先分出高下。

艾達臣摩拉斯今季上陣34場1紅3黃，尼克普比從冇缺席英超，37場全勤，只獲1面黃牌，表現非常穩定，曼城煞科戰主場鬥榜尾嘅諾域治，相信艾達臣摩拉斯唔會失波，加上曼城入多3球就可以達100球大關，今場捧3.5球入球大。（Now 627周日晚11時直播）

至於般尼主場迎戰白禮頓，尼克普比亦好大機會可以保持清白之身，球隊近7場全開2球或以下，今場揀2.5球入球細。（Now 626周日晚11時直播）

曼城吼大般尼博細
如果最終2人同場數究竟會點計？自2004/05年球季設立金手套獎以嚟，只頒畀一名門將，如果清白之身一樣，就會計出場比率。但自2013/14年球季開始取消呢個制度，只計清白身場數唔計出場數字，所以艾達臣摩拉斯同尼克普比有機會開心Share英超金手套。

上次由2名門將同得金手套，就係2013/14年球季，由當年效力車路士嘅施治同阿仙奴嘅施捷斯尼分享，至於保持英超金手套最高不失場數嘅亦係施治，佢喺2004/05年球季為「車仔」保持24場不失，助球隊首奪英超冠軍。