C朗爭神射手盡情數胡
意甲榜首祖雲達斯主場對森多利亞，祖記上場作客不敵烏甸尼斯，搞到未能提早捧盃。呢支意甲班霸今場返回自己地頭唔可以再失威，勢必全力爭勝奪冠，加上C朗要爭神射手殊榮，更加要盡數對手。不過，祖雲達斯今季防線水平倒退，恐怕難保清白之身，讓兩球有風險，寧願博中位數3.5球嘅入球大。(myTV Gold 301、Now 638及有線654、614、662、602台周一凌晨3時45分直播)

祖雲達斯上場領先之下，倒輸1比2畀護級分子烏甸尼斯，令好多人跌眼鏡，甚至有「陰謀論」指祖記專登失分，留待今場返回主場先至贏波捧盃。以呢支8連冠超級班霸嘅實力，的確有能力玩「收放」，預料今場贏波機會高唱入雲。

後防青黃不接易失波
C朗已有30球進帳，落後射手榜一哥恩莫比尼1球，隊友們今場應該會全力製造機會畀佢入波。不過，祖記防守力大不如前，亦係不爭嘅事實，今季聯賽已失38球，比上季全季多8球，甚至比前季多14球，皆因後防人腳青黃不接，邦路斯已老化，新星馬菲斯迪歷特水準不穩，祖雲達斯近7場聯賽失14球，換言之平均1場失2球，當C朗、保羅戴巴拿盡情數胡嘅時候，亦要提防祖記後欄起火。

森多利亞已經冇護級壓力，可以大踢風流波，前鋒加比亞甸尼近4場入3球，狀態相當唔錯，老將加利亞雷拉不時轟入刁鑽入球，令對手防不勝防。森多利亞近5次對祖雲達斯，有4次取得入球，就算今場輸波，都應該可以破蛋，首選入球大。另外，祖記近4次主場對森多利亞，有3次都開半場勝，值得跟進。