韓職周日直播大戰，有衞冕嘅全北汽車主場迎戰ＦＣ首爾，兩大名牌近期成績都唔多理想，亦趕喺轉會窗關閉前積極增兵，成為市場焦點。全北有兩大攻擊強援加盟，今場有機會首演騷Quali，為追趕榜首肯定全力搶攻，首爾近期亦以進攻踢法求破低潮，博2.5球嘅入球大好路！（無綫85台周日晚6時直播）

全北汽車近3場聯賽2和1負，榜首位置送咗畀蔚山現代，41歲王牌前鋒李東國嘅缺陣影響極大，呢點亦係全北面臨嘅最大問題，不過佢哋亦對症下藥，近期簽入上季畀雷丁借去土超、27歲岡比亞翼鋒莫度巴路，以及羅致哥連泰斯嘅巴西高大中鋒古斯達禾軒歷基，2位新援級數頗高，今場會先任後備待命，大大加強「綠軍」進攻火力。

奇誠庸傷患未清難披甲
作客嘅ＦＣ首爾亦有矚目增援，外流歐洲11年嘅中場奇誠庸強勢回歸，不過佢因為久疏戰陣，傷患又未清，8月先會落場。首爾沉淪尾2，為打破頹勢近期踢法亦偏向冒險，結果近3場聯賽失咗8球波，今場佢哋仲有後防核心人物金南春停賽，「止血」難度更加高，唯一偷雞機會就係以攻為守，前線會起用小將趙永旭拍朴主永攻堅加強活力，希望入波比失波多，開「大」盤機會極高。