關西雙雄正面交鋒
今日日職一口氣上演9場波，其中最為矚目嘅，梗係兩支關西人氣球隊神戶勝利船主場迎戰大阪飛腳。勝利船自復賽首仗大敗後，戰績穩步上揚，今仗有埋地利肯定踢得更落力。另邊廂，飛腳向來攻強守弱，加上過往兩軍對碰例多波入，中位數2.5球大盤要追。（有線662及602台周日晚6時直播）

勝利船坐擁恩尼斯達及華美倫兩大球星，可惜復賽首仗主場出擊，即淨吞廣島三箭3蛋，大敗原因是後防未能適應「343」新陣式，經過調整後近期表現亦回升，近4場取2勝2和，包括喺主場以3比1贏清水心跳，雖然上輪作客同實力較次嘅大阪櫻花互交白卷，但其實該仗櫻花門將金鎮鉉「上晒身」，先至未能取得士哥，本身勝利船除咗兩粒「大星」，前鋒古橋亨梧及戴恩費斯杜格拉斯亦屬有料之人，二人合作無間，又有前日本國腳山口螢從後支援，今仗應可取得入球。不過佢哋防守始終未算嚴密，連同今年初亞冠盃，勝利船今年4次主場均有失波，未能保持清白。

飛腳陣中有宇佐美貴史同老牌中場遠藤保仁，論「星味」實不亞於勝利船。本身飛腳踢法攻強守弱，今季6場聯賽有5場開3球或以上。再睇對賽往績，兩軍近5次聯賽交手，有4次開3球或以上，當中上季兩次交手有1場總入球開「7+」，最近一次交手亦打成2比2，今仗「關西雙雄」交鋒，預計又係一場入球騷。

心跳受讓唔怕三神
至於同日另一場直播戲碼，清水心跳主場對大分三神，心跳上輪作客以1比1賽和鳥棲砂岩，取得積分榜上嘅「零的突破」，對士氣肯定有幫助。反觀客隊三神，上場慘吞名古屋鯨魚3蛋，狀態麻麻，加上佢哋之前對住擅長地面戰嘅大阪飛腳、神戶勝利船均陷於苦戰，今戰面對踢法相若嘅心跳，恐難有運行，「讓球主客和」仲要讓波，捧番心跳穩陣。（有線664、604台周日下午5時直播）