復賽收火作客睇定嚟踢
全力向聯賽冠軍進發嘅皇家馬德里，今輪西甲壓軸戰作客CF格蘭納達。皇馬教練施丹採不慍不火嘅戰術挑戰錦標，復賽雖然8連勝，但甚少大炒對手，尤其作客更加踢得謹慎，計埋停擺前5場聯賽作客，4場同對手半場打和，今場可以再追半場和。

■（Now 632周二凌晨4時直播）

皇馬復賽後成功之道，係施丹減低球員無謂消耗，人腳調動得宜，除咗幾名主力球員較多上陣，其餘位置都會有些微輪換，但主要係位換位，戰術上唔會有太大改動，令到球員們容易適應。此外，復賽後皇馬亦甚少大炒對手，唔會採高壓主攻，總之目標為本3分到手就得，反而着力做好防守，復賽8戰只失2球，有6場保持不失。

現時皇馬少踢1場領先巴塞1分，連同呢場剩低3輪聯賽，「銀河艦隊」只要贏2場就可以提早奪冠，形勢大好。今場隊長沙治奧拉莫斯同丹尼爾卡華積刑滿復出，可以進一步鞏固後防，繼續其穩中求勝戰術，向錦標進發。

由於冠軍在望，據知皇馬正同馬德里市長商討，喺豐收女神廣場慶祝西甲捧盃嘅相關方案，事關喺新冠疫情危機下，皇馬同政府方面都要採取全面細緻嘅預防措施。

CF格蘭納達一味靠守
主場嘅CF格蘭納達排聯賽第9位，高不成低不就，戰意一般，加上以往對親皇馬都輸，今場最大目標都係守住後防，輸少當贏，撞正皇馬呢排近5場聯賽作客，4次半場同對手打和，預計今場頭45分鐘未必分到勝負，捧半場和啱數。