唔計尋晚賽事，經過上周中後英超已踢咗34輪，即係剩番4輪就煞科，無論係爭取前列嘅下屆歐洲賽資格，抑或下游分子搶分護級，都非常緊湊，加上近日香港又掀起第三波新冠肺炎疫情，我建議大家留喺家中，馬照跑、波照睇。

摩連奴已江郎才盡
講到戲碼較好嘅賽事，梗係今明兩晚。先講講今晚北倫敦打吡，熱刺主場火併死敵阿仙奴，熱刺主帥摩連奴確實畀人有江郎才盡之感，近期戰績頗為飄忽，上仗作客弱旅般尼茅夫又互交白卷，好聽啲係連續兩場冇失波，防守穩陣咗，但凸顯出進攻乏力嘅問題，顧此失彼，若果搶唔到歐聯入場券，隨時冇得留低，而阿仙奴近5仗4勝1和弗爆，今仗一定精彩。

至於夜少少開波，有般尼茅夫主場對李斯特城，般茅雖然要搶分博上岸，但我覺得佢哋有心無力，李斯特城自復賽後表現一般，如果今仗有乜閃失，有機會跌出前4，何況之後仲要連撼錫菲聯、熱刺同曼聯，今仗遇弱必定要攞晒3分打底，「狐狸」客勝更值博。最後係聽晚曼聯主場對修咸頓，紅魔聯賽4連勝弗到漏油，為爭入前4名開行晒turbo，不過主W堅熱冇肉食，讓球盤讓到1.5/2球咁辣，而且贏1球拎3分，贏10球都係拎3分，隨時贏波輸盤，呢場同北倫敦打吡都係睇波算數。

金句

英超聯賽本輪賽事，好戲盡歸今明兩晚。