拉莫斯停賽攻力損
周五深夜西甲繼續上演好戲，1哥皇家馬德里將會喺B隊嘅迪史堤芬奴球場布陣，迎戰下游球隊艾拉維斯。「銀河艦隊」復賽後改踢功利足球，憑穩健防守經常小勝，今場仲有復賽後幫皇馬入5球嘅沙治奧拉莫斯停賽添。艾拉維斯仍未上岸，遇強更不敢冒進，3.5球入球細好路。

（Now 632周六凌晨4時直播）

皇馬復賽後聯賽豪取7連捷，目前於聯賽榜少賽1場下領先巴塞1分，奪冠形勢大好。皇馬之所以成功，關鍵係一改以往全攻踢法，7戰僅入13球失2球，5場保持清白之身，近3場更以1比0小勝愛斯賓奴、基達菲及畢爾包，實行「魚生粥」戰術。事實上，皇馬今季34輪聯賽只失21球，並有18場保持清白之身，失球之少冠絕歐洲5大聯賽，可見皇馬防守力之強。

今場皇馬有「帶刀侍衞」沙治奧拉莫斯，以及丹尼爾卡華積停賽，夏薩特有啲傷上陣成疑。最大問題係，皇馬復賽後雖然係咁贏，但全靠「沙拉」復賽7場入5球先可以領先巴塞，依家佢停賽攻擊力削弱，入波機會更少。

艾拉維斯遇強必死守
相反下游分子艾拉維斯，復賽後7場聯賽只得1勝6負，其中5場食白果，攻擊力極為疲弱，幸艾拉維斯暫時位列尾4，比尾3嘅馬略卡多6分，護級形勢未算太惡劣，今場面對強敵，一定先做好防守，實行「1分政策」。兩軍近6次聯賽碰頭，皇馬雖取得5勝1負，但有5次開3球或以下，其中有3場小勝1球，加上皇馬近6場聯賽總入球都係3球或以下，3.5球細熱得有道理。