執掂防線殺得性起
今晚英超快車惡戰連場，阿仙奴喺主場迎戰3哥李斯特城。「兵工廠」連盃賽豪取4連勝，有傳隊長奧巴美揚續約一事有進展，士氣大振，加上一向靠主場搵食，酋長球場更專剋「狐狸」，為爭下屆歐洲賽入場券必搏盡，主勝有計。

（Now 621及611周三凌晨3時15分直播）

李城上仗大勝水晶宮3比0，自復賽後首嘗勝果，射手占美華迪更省兩粒，令佢喺英超累積101球，躋身英超「100 Club」，終於翻身，不過佢哋直到下半場先打開紀錄，而且水晶宮已差唔多上岸，戰意麻麻，失波後即告崩潰，加上「狐狸」主力艾約斯佩雷斯、占士麥迪臣都傷埋，唔好睇得佢哋咁高。

反而復賽後即兩連敗嘅阿仙奴，主帥阿迪達見勢色唔對變陣，改踢3後衞陣式圖鞏固防線，以往喺中路錯漏百出嘅梅斯達菲同大衞雷斯，喺加入哥拉辛拿斯幫手後，多個人執漏亦穩陣咗好多，連英足盃在內，近4場贏晒之餘，只係失咗1粒咁大把，包括上仗作客以2比0擊敗弗爆嘅狼隊，令信心回升。

奧巴美揚放風續約振士氣
之前唔肯續約嘅隊長奧巴美揚，近日開始轉口風，暗示續約問題有得傾，仲大讚自阿迪達中途上任後，球隊愈踢愈好，睇嚟留隊機會唔低，仲可以穩定軍心。的確阿迪達接手後，阿仙奴主場演出特別醒神，近6場英超主場取得5勝1和未輸過，復賽之後唯一一場主場賽事，就以4比0大炒諾域治，對上4場主場有3場攻入3球或以上，火力唔講得笑，為爭下屆歐洲賽席位，主場出擊更不容有失。何況阿仙奴主場向來係李斯特城「凶地」，單計酋長球場，「狐狸」近5次聯賽造訪此地都輸波而回，阿仙奴有力乘勝追擊，主勝有買趁早。