未解釋金句之前，先講講今晚英超獨腳戲，熱刺主場對愛華頓。雖然熱刺排名較高，但其實兩軍只係相差1分，而且愛華頓領隊安察洛堤乃一代名帥，肯屈就執教「拖肥糖」，矢志喺英超捲土重來，自佢接手後愛華頓戰績亦穩步上揚。反觀熱刺主帥摩連奴確有回塘迹象，兩位唔單止都教過皇馬，仲曾經喺米蘭市做敵人，今仗可謂面子攸關，「肥安」誓要證明自己勁過「寸王」，愛華頓受讓玩得過。

紅軍仍沉醉於奪冠喜悅
至於「拖肥糖」同市宿敵利物浦，由於提早奪得英超冠軍，亦喺其他盃賽出局，雖然傳媒狂吹佢哋要破英超最高得分紀錄，但由2019年年中計，紅軍先後於歐聯、歐超盃、世冠盃及英超封王，辛苦咗咁耐，依家沉醉於奪冠喜悅屬人之常情，既然餘下聯賽成例行公事，主帥高普或會起用副選甚至新人，為未來做好準備。

言歸正傳，今日想同大家講吓7月中舉行嘅英足盃4強，兩場都係戲碼十足嘅「紅藍對決」，分別係阿仙奴對曼城，同埋曼聯對車路士。由於英足盃成為呢幾隊豪門今季「尾寶」，加上一場過淘汰賽變數太多，所以我都係推介買冠軍，心水就係曼聯。自從佢哋季中簽入波基斯費南迪斯後，班波重上正軌，保羅普巴又傷愈復出，而安東尼馬迪爾、格連活特同拉舒福特踢到生晒，季尾愈踢愈順，依家賠率由5倍跌到落4.5倍，點都抵玩過其餘3隊。