爭標不容再失
今晚西甲爆發前列大戰，巴塞隆拿主場硬撼馬德里體育會。巴塞客場頻頻甩轆，為爭冠返主場不容再失，而且近年聯賽喺地頭專剋馬體會，隊長美斯誓要達到700球里程碑，挾魯營主場強勢可震懾陣容不整嘅「床單兵團」，主勝有買趁早。（Now 632周三凌晨4時直播）

排次席嘅巴塞依家落後皇馬2分，由於同分計對賽成績，巴塞兩循環鬥皇馬僅得1和1負，因此若果最終同分收場，亦會因對賽輸蝕而失冠，爭標形勢處於被動，餘下賽事1分都不能少。

巴塞今季16仗作客聯賽贏得6場，包括日前造訪切爾達，又臨尾香被逼和2比2，原本穩袋嘅3分咁樣嘔番2分出嚟，難怪梅開二度嘅蘇亞雷斯賽後都勁冇癮，因此返主場要更加落力。佢哋今季16次聯賽主場出擊，豪取15勝1和未輸過，雖然中場法蘭基迪莊續抖，好彩老將布斯基斯刑滿復出，可謂及時雨。隊長美斯現時喺職業生涯累積轟入699球，只差1粒便達到700大關，今場一定搏盡。

地頭恰慣馬體會
馬體會自復賽後5場聯賽獲4勝1和，上仗擊敗艾拉維斯後，主帥施蒙尼超越已故名帥阿拉干利斯，以195場勝仗成為率領「床單兵團」贏波最多嘅教頭。雖然睇落表現唔錯，但被寄予厚望嘅「新C朗」祖奧菲歷斯演出時好時壞，艾華路莫拉達亦飄忽到暈，單靠迪亞高哥斯達，真係難為呢位老人家，尤其馬體會今場有中堅史提芬沙域同中場佐治高基坐波監，令中後場防守打折扣，既然巴塞近5次聯賽主場對馬體會取得4勝1和，喺魯營出擊明顯食住對手，主勝值得捧場。