死敵攞聯賽冠軍，曼聯要喺盃賽發力！「紅魔」喺英足盃8強，將會作客諾域治，曼聯絕對抽到上上籤，畢竟諾域治英超排榜尾，喺密集嘅復賽賽程之下，已經冇餘力應付盃賽，加上曼聯一向係「金絲雀」剋星，近8次交手贏7次，「紅魔」肯定可以90分鐘內解決諾域治，曼聯讓一球，要上盤。

（周日凌晨零時30分開賽）

諾域治要留力護級
曼聯周中聯賽3比0大炒錫菲聯，喺保羅普巴同波基斯費南迪斯「雙核」嘅供應之下，前鋒安東尼馬迪爾上演帽子戲法，眼見死敵利物浦攞到聯賽冠軍，曼聯當然不敢怠慢，今季仲可以稱霸足總盃同歐霸盃，做盃賽「雙冠王」。

「紅魔」對上一次贏足總盃，係2015/16年球季由尹戈爾帶領之下奪得，領隊蘇斯克查當然想好夢重溫，難得抽籤遇着私房菜，一定唔會放過晉級機會，曼聯近8次鬥諾域治贏7次，包括今季2次於蘇帥麾下作客贏3比1及主場大勝4比0，蘇斯克查對付諾域治絕對係「依絲執」。

諾域治英超重開之後2連敗，聯賽只餘7場，要佢哋兼顧足總盃肯定進退兩難，即使殺入4強，仍要面對其他強手，倒不如盡力護級好過。今場對曼聯有乜損傷仲大鑊，而且即使盡力踢，都未必頂得住對手來襲，鬥心成疑，曼聯作客讓一球擺明有信心，上盤好路。