今晚西甲賽事，2哥巴塞隆拿作客切爾達。巴塞主力年齡偏大，賽程頻密下，隊長美斯等人漸見疲態，中場孖寶法蘭基迪莊及布斯基斯因傷停缺陣，冇晒創造力；切爾達主場專剋「地上最強」，為搶分護級戰意必堅，受讓捧讓球主勝。

（Now 632及611周六晚11時直播）

巴塞主力老化
「地上最強」巴塞陣容老化係不爭事實，碧基、維達爾、拿傑迪錫同美斯都3字頭，難以長期保持高水準，重點栽培嘅法蘭基迪莊亦因傷要抖兩周，連布斯基斯都要坐波監，嚴重影響組織力。美斯只差1球就取得職業生涯第700球，上仗雖然助攻畀拿傑迪錫建功，但賽程頻密令佢亦呈疲態，可惜巴塞依然要靠呢位球王數胡，搞到主帥史坦恩變無可變。

另邊廂，切爾達周中以1比0小勝皇家蘇斯達，護級壓力稍為減輕，佢哋復賽後獲2勝1和1負，當中包括上次主場狂數艾拉維斯6粒，箭頭伊亞高艾斯巴斯連續兩仗有波入，重拾射門鞋。翻查紀錄，切爾達近5次主場對巴塞，錄得3勝2和未輸過，主場食住「地上最強」，有得受讓咁筍，讓球主勝咪錯過。