隨住疫情放緩，歐洲各大聯賽亦重燃戰火，我有份評述嘅德甲已塵埃落定，拜仁實現8連冠霸業，而英超自上周中重開後，直至今晚先至寶物沉歸底，上演The Merseyside Derby（默西賽德郡打吡），由榜首利物浦作客同市宿敵愛華頓。

點解叫做Merseyside？其實當地有條河叫做River Mersey，但英國人好鍾意用side嚟形容河流，Merseyside因此而得名。有睇開呢個專欄嘅球迷都知，我喺季初已預言利物浦一定封王，從未動搖過，唯一擔心係突如其來嘅疫情，會否無情地將球季腰斬呢？好彩等待百多日後，英超終於重開，畢竟現代足球涉及太多經濟元素，環環緊扣，就算要閉門作賽，亦可透過電視直播收睇，喺可行嘅情況下，都會盡量減低經濟損失。

紅軍封王結局已定
老實講，紅軍今仗無論贏輸和，都阻唔到佢哋今季封王嘅結局，唔通剩番9輪聯賽都贏唔到2場咩？我早喺上年10月以玩票形式，用1000元博700多元嘅回報，買咗利物浦奪冠，好多人會認為就算贏梗，卻要等咁多個月先有錢收，唔多划算，不過睇番紅軍嘅人腳、板櫈深度、對爭標嘅飢渴感等，都勝過其他對手，試問有邊隻股票，你買咗半年或9個月後一定賺梗？值得一提嘅係，單場贏輸變數太多，例如球員失準、紅牌、VAR等等，足以影響賽果，但一支球隊要贏聯賽冠軍，係靠整體實力、長期穩定性等因素，所以我呢種長線投資嘅玩法，比買單場更可取，而睇住緊張刺激嘅默郡打吡過父親節，一樂也。