意甲今晚重開，頭炮由拖連奴主場迎戰帕爾馬；拖連奴今年2月換帥之後，表現仍然冇起色，加上受傷兵問題困擾，恐怕難以翻身。帕爾馬要爭奪歐洲賽資格，必定搏盡，今場仲有得受讓平半，捧帕爾馬下盤。

（Now 638、有線654、614、662、602台及無綫myTV SUPER 301台周日凌晨1時30分直播）

拖連奴2月初炒咗名帥馬沙利，請番球隊前青年軍教練朗高執教。雖然呢位44歲少帥喺球員時代出身於拖連奴，對球隊文化非常熟悉，但佢只有4年執教成年隊經驗，搵佢幫手救亡，明顯不切實際。

朗高帶隊之後，拖連奴3戰全敗，加埋之前嘅敗仗，球隊已經累積聯賽6連敗，慘不忍睹，如果今場輸埋，就會造出拖連奴史上最長意甲連敗劣績。呢個尷尬情況的確好大機會發生，因為拖連奴中場丹尼爾巴斯利、前鋒施蒙尼華迪、後衞安沙迪都因傷缺陣，三線陣容不整，就算有主場地利都冇本錢反彈。

拖連奴主場惡唔出樣
至於排第9位嘅帕爾馬只落後第7位ＡＣ米蘭1分，而且踢少1場，仲有機會爭奪下屆歐霸盃入場券。雖然話歐霸盃係「二奶盃」，但對於帕爾馬呢種球會仔嚟講，卻係難得嘅搵錢機會，所以必定全力爭到底。再睇埋帕爾馬近6次作客拖連奴，取得2勝3和1負，不敗率極高，今場居然受讓，帕爾馬下盤抵玩。