周六英超早場屈福特主場鬥李斯特城，係領隊尼祖皮亞臣復仇兼挽回名譽之戰。尼祖皮亞臣當年因為兒子召妓醜聞被「狐狸」無情解僱，今仗倒戈當然希望贏波報仇，證明自己能力之餘兼為「大黃蜂」護級，佢哋主場曾經贏過利物浦、曼聯及狼隊等，今場受讓之下，讓球主勝值得捧場。

（ViuTV 99及Now 621周六晚7時30分直播）

尼祖皮亞臣曾於2011至2015年執教李斯特城，更喺2014至2015年球季最後9場，帶領球隊贏咗7場避過降班厄運，但當年因為個仔喺泰國踢熱身賽時召妓，最終畀李城炒魷；當然，再之後請咗雲尼亞里再勇奪聯賽冠軍，又係另一個故事。

不過，以執教能力計，尼祖皮亞臣絕對唔失禮，屈福特自去年12月委任佢執教後，成績有明顯改善，尼祖皮亞臣上任前15戰只贏過1場排包尾，現時護級已露曙光。「大黃蜂」主場戰績威水，曾經以2比0擊敗曼聯同2比1勇破狼隊，停擺前最後一場主場更以3比0輕取1哥利物浦，打出漂亮一仗，累積停擺前近6場主場獲4勝1和1負佳績，絕對無懼另一前列球隊李斯特城。

大黃蜂連續3季主宰狐狸
李斯特城現時排第3，與第5名嘅曼聯仍有一段距離，搶分壓力唔算太大，「狐狸」於停擺前最尾4場英超，有3場未能取得入球，而且過去3季作客屈福特，全部以1比2輸波，連往績都輸埋，今場仲要讓波，你話屈福特個讓球主勝係咪抵玩先？