正式為英超重開揭開序幕嘅，係阿士東維拉主場鬥錫菲聯。錫菲聯今季憑藉堅固防守進佔聯賽榜第7位，現時失球數字屬英超第2少，佢哋喺停擺前11場聯賽作客，有10次開2球或以下，預料今場會以穩守行先再伺機突擊，況且維拉亦欠進攻板斧，中位數2.5球入球細好路。（Now 621周四凌晨1時直播）

經過3個月停賽期，阿士東維拉於上周四同李斯特城同日踢咗兩場熱身賽，希望操起狀態，下畫踢1場，夜晚踢1場，維拉喺主場輸0比1，但作客李斯特城就贏3比0。至於錫菲聯則與正副隊長比利沙柏及羅活續約，提升士氣。

兩隊都係今季嘅升班球隊，但經過大半季之後成績卻大有差別；今次主場出擊嘅阿士東維拉，現時28戰25分排尾2，同聯賽排名對上3隊有2分距離，餘下賽事要為護級努力。相反，錫菲聯則28戰43分排第7，同第4位嘅車路士相距5分，下屆歐聯入場券仲有得爭，確實唔簡單。

維拉欠入波本錢
錫菲聯今季全靠防守打天下，聯賽28戰只失25球，僅比利物浦多失4球，今季10場不失球賽事中，包括首循環以2比0擊敗維拉。錫菲聯作客以鐵桶陣抗敵，停擺前11場聯賽作客10次開2球或以下，今場應該會用番呢套技術招呼維拉，再搵機會突擊爭取入波。至於主隊阿士東維拉冇乜入波本錢，攻勢太集中喺球星基亞利殊身上，因此錫菲聯只要作出針對性部署就搞掂，加上今場係閉門作賽，維拉冇咗球迷打氣，表現隨時再差啲，預計今場入波唔會多。