西甲重開今晚續演兩場賽事，頭場先有CF格蘭納達主場鬥基達菲；CF格蘭納達今季主場成績唔錯，不過賽事改為閉門舉行增添變數，而且佢哋位列中游冇降班威脅，搶分決心唔及仲有機會爭踢歐聯嘅基達菲；基達菲停擺前4場聯賽作客贏3場，小讓平半捧上盤。（Now 632周六凌晨1時30分直播）

格蘭納達踢風流波
CF格蘭納達今季13場聯賽主場8勝2和3負，主場成績排西甲第6，而且曾經贏過巴塞及打和馬體會，以一支中型班嚟講，表現絕對合格。不過參考上月德甲重開首輪9場比賽，只有1支主隊能夠順利贏波，閉門作賽冇咗主場氣勢，對某啲球隊的確造成一定影響。CF格蘭納達現排第9位，既冇降班威脅，爭踢歐洲賽機會亦唔大，名副其實踢風流波，冇咗主場球迷支持打氣，更難激起主隊爭勝決心。

基達菲上季排聯賽榜第5位，失落歐聯入場券，今季捲土重來依然保持水準，聯賽停擺前佢哋27戰得46分，唔計周五成績，只比3哥西維爾少1分，有力再次衝擊歐聯參賽資格。基達菲上半季因要兼顧歐霸，本土聯賽失咗唔少分，依家歐霸未重開，可以專注聯賽搶分。基達菲對上4場聯賽作客3勝1負，唯一輸波係僅負巴塞隆拿1比2，其餘3場贏波都冇失波，讓平半上盤捧得過。