慕遜加柏有前冇後
今輪德甲喺周六凌晨率先上演獨腳戲，弗賴堡主場迎戰慕遜加柏。弗賴堡喺聯賽重開之後，4戰仍然不勝，但佢哋主場往績佔優，有望反彈。另邊廂，慕遜加柏踢法有前冇後，肯定唔會坐以待斃實搶士哥，中位數2.5球嘅入球大值博。

（Now 670、有線651及611台周六凌晨2時30分直播）

雖然弗賴堡整體實力只屬一般，但往往可以喺主場踢出超水準，今季聯賽主場就曾經打和第2位嘅多蒙特2比2，同埋以2比1擊敗第3位嘅RB萊比錫，可見佢哋喺自己地頭，搶分能力非常強，所以今場即使遇上第4位嘅慕遜加柏，應該無懼同對手鬥攻。

前線3子入球停不了
事實上，弗賴堡近9次聯賽主場對慕遜加柏取得8勝1和，而最近3場仲係全勝添。其中上季憑3位前鋒尼斯彼德臣、禾特舒密特、盧卡斯賀拿各入1球，以3比1勝出。呢3人今季表現仍然出色，已經合共轟入19球，有力撕開慕遜加柏防線。

至於慕遜加柏現時僅以較佳得失球差，力壓同分嘅利華古遜佔據第4位，為奪取下屆歐聯入場券，絕對冇失分空間，相信今場作客都會照攻。

慕遜加柏喺德甲復賽後，踢得非常開放，包括作客以3比1擊敗法蘭克福，上場更加大勝林柏聯4比1。同埋佢哋近4次聯賽對弗賴堡，有3次總入球達4球或以上，包括首循環慕遜加柏贏4比2，預料雙方今場又會搏拳，有望再演入球騷。