意大利盃4強今晚上演另一場次回合大戰，首回合領先1比0嘅拿玻里主場鬥國際米蘭。拿玻里踢意盃戰術非常謹慎，今屆3戰全部保持不失，今場仲揸住1球優勢和都搞掂，唔使同國米急，雙方近6次交手4次半場不分勝負，今場可以吼實半場和。

（周日凌晨3時開賽）

領先1球唔使急攻
拿玻里自教練加度素接過帥印後，喺盃賽成績不俗，歐聯16強首回合同巴塞踢成1比1，意盃亦殺入4強，據聞球會即將同佢續約至2022年。球員時代司職防守中場嘅加度素，重視機動性及紀律性，拿玻里踢法亦轉趨硬朗，呢位球壇名宿接手拿玻里後，聯賽及盃賽對國際米蘭各贏1場，不分高下，既然球隊於首回合領先1球，今場亦唔急於進攻，可以睇定嚟踢。

國際米蘭教練干地喺停擺期間，特別為由熱刺加盟嘅基斯甸艾歷臣調整戰術，將呢位丹麥國腳放喺傳統「10號位」，不過由於未有正式比賽，一班球員都要習慣新陣式，預計上半場雙方都要作出一定適應同試探，戰情容易膠着。事實上，兩軍實力旗鼓相當，強強對碰唔會貿然出手，雙方近6次對賽有4次開半和，不妨追多一次。