拿仁今日有冷品介紹畀大家，包尾嘅柏達邦作客RB萊比錫，今場玩半場和。柏達邦雖然敬陪末席，但作客經常踢出鬥志，對手唔係咁易入到佢波，強如拜仁慕尼黑及慕遜加柏主場出擊，亦只能同柏達邦半場打和。RB萊比錫仍然要為力保歐聯入場券努力，不過近期後防頻頻出錯導致險象橫生，今仗或會先穩住防線再謀後動，半場和有3.5倍玩得過。

（Now 671、有線652及612台周六晚9時30分直播）

RB萊比錫喺復賽後接連於主場打和弗賴堡及哈化柏林，2場失4分，現時只排第3，同拜仁相差9分，奪冠機會渺茫之餘，仲要擔心「火燒後欄」，因緊隨其後嘅慕遜加柏同利華古遜，只比佢哋少2分，若有任何差池，隨時前4不保。

萊比錫睇定嚟踢
萊比錫上仗大勝科隆4比2，表面睇嚟球隊發揮甚具霸氣，但實際上萊比錫7分鐘已經失守，呢球失波亦係萊比錫近4場3次上半場首先失波，之前2次就係主場對弗賴堡及哈化柏林，球隊唔想重蹈覆轍最終失分，今場必定要打醒十二分精神做好防守，而且萊比錫實力更勝柏達邦，可以慢慢睇住嚟食。

柏達邦近8場聯賽作客7次開半場和，對手包括榜首拜仁同「4哥」慕遜加柏，真係有力頂得兩嘴，柏達邦亦曾經作客半場領先多蒙特3比0，今場必定繼續以死纏戰術對抗RB萊比錫。正所謂前車可鑑，相信萊比錫唔會大意，預計戰情會陷入膠着，半場和有3.5倍超級抵玩。