今晚西甲尾場上演巴倫西亞打吡戰，華倫西亞迎戰利雲特。華倫今季14場聯賽主場保持不敗，戰績媲美榜首雙雄巴塞及皇馬，而且華倫近年打吡戰專恰利雲特，近4次交鋒獲3勝1和，熱捧主勝。（Now 632周六凌晨4時直播）

雖然波童提過閉門作賽或對主隊有影響，不過「蝙蝠兵團」華倫今季14場聯賽主場8勝6和未輸過，與巴塞、皇馬成為今季西甲3支主場未敗之師之一，水準非常穩定，而且呢場係同市打吡戰，勝負關乎球會榮辱，參考德甲重開首輪唯一一支主隊贏波，正正就係多蒙特喺魯爾區打吡擊敗史浩克04，足證呢類打吡場合，就算冇球迷入場，為面子都肯定唔會放軟手腳。

利雲特近4對賽未贏過
何況，華倫目前排聯賽榜第7位，唔計周五凌晨成績，只比3哥西維爾少5分，仍有機會爭入前4踢歐聯，戰意唔使懷疑。相反「小蝙蝠」利雲特現以27戰得33分排第13位，領先尾3嘅馬略卡8分，降班威脅唔太大，決心比唔上華倫。利雲特近年喺打吡戰被華倫恰死，近4次交手只得1和3負，包括今季首循環主場大敗2比4，加上佢哋停擺前5場聯賽作客全部輸晒，主勝可放心捧場。