踢早場9成贏唔出
今晚西甲早場又有武磊睇喇，佢效力嘅愛斯賓奴主場迎戰艾拉維斯。不過愛奴踢親早場都瀨嘢，主場出擊又渣，仲有正選門神迪亞高洛迪古斯坐波監，原本不穩嘅防線更牙煙，艾拉維斯可趁機搶分，受讓必捧讓球客勝。

（Now 632周六晚8時直播）

西甲賽會今季致力拓展中國市場，梗係要搵武磊做生招牌，為咗遷就中國球迷可以喺食緊飯嘅黃金時段睇波，唔使捱夜，經常安排愛奴踢早場，即係當地時間中午，有利西甲賽會吸金，不過呢個舉動就累咗愛奴。

原來愛斯賓奴今季踢咗13場早場，只得1勝3和9負，一來早場太多，二來西班牙球員普遍唔習慣咁早踢波，反觀佢哋喺其餘夜啲開波嘅14場比賽，就攞到14分，好明顯因為商業決定而犧牲成績，難怪依家排緊包尾，今仗繼續踢早場絕對難以樂觀。

艾拉維斯搶分趕上岸
除此之外，愛奴一向穩健嘅門神迪亞高洛迪古斯，因為喺停擺前對奧沙辛拿「兩黃一紅」被逐，延至今仗至坐波監，對於呢支已失46粒嘅包尾大幡嚟講，打擊更大。另一邊廂，位列下游嘅艾拉維斯，領先尾3嘅馬略卡7分，不過聯賽仍有漫漫長路，仍需搶分求盡快上岸，前鋒祖斯盧辛馬田今仗停賽，相信會先做好防守。翻查紀錄，愛奴主場戰績堅曳，今季13次聯賽主場出擊，贏得1場咁大把，邊有本錢讓波吖，轉捧讓球客勝。