今晚德甲頭場大戰，深陷護級漩渦嘅雲達不來梅，主場迎戰禾夫斯堡。不來梅啱啱上周中先踢完補賽，可惜慘敗收場，兼且體力消耗頗大，力疲心傷下，遇上養精蓄銳、作客特醒嘅禾堡，有地利都凶多吉少。禾堡小讓平半，一於撐上盤！

■（Now 670、有線651及611台周日晚7時30分直播）

尾2嘅不來梅，於德甲停擺前6場聯賽僅得1和5負，護級形勢水深火熱，點知疫情爆發賽事停頓，令佢哋因禍得福，獲得充足時間調整，聯賽重開後頭4仗，取得2勝1和1負，重燃護級希望。

不來梅新敗露疲態
可惜不來梅上周中鬥法蘭克福又打回原形，原本守得幾好嘅防線，下半場突然崩潰，最終慘吞3蛋，亦令不來梅喺德甲主場嘅不勝走勢增至12場，可見賽程頻密下漸露疲態。未計今輪，不來梅仍落後尾3嘅杜塞爾多夫、尾4嘅緬恩斯2分及3分，聯賽只剩番5輪，護級形勢依然被動。

禾夫斯堡今季表現穩打穩紮，而且暫時唔使兼顧歐霸，可以專注聯賽。自德甲重開後，禾堡4戰錄得2勝2負，咁蹺2場勝仗都係作客，中場麥斯美艾洛特近2仗入1粒兼交出3個助攻，狀態大勇。再追溯禾堡停擺前客場表現，發現佢哋對上一次作客輸波，已經要數到今年1月歇冬重開後輸畀科隆，之後聯賽5場作客，取得4勝1和佳績，客場成績比主場更穩定，今仗造訪不來梅可秤先，上盤有買趁早。