主場專恰強隊
今晚德甲尾場大戰，法蘭克福主場硬撼「4哥」慕遜加柏。法蘭克福目前聯賽雖排第12位，不過佢哋向來遇強愈強，現時前5名球隊今季嚟到呢度都要失分，加上對賽往績有優勢，法蘭克福受讓平手、半球，必捧下盤。

（Now 671、有線612及652台周日凌晨零時30分直播）

法蘭克福現時聯賽排名12，表現唔算突出，不過佢哋能夠打入歐霸16強及德國盃4強，證明有一定戰鬥力，而且佢哋喺主場迎戰強隊特別醒神，今季聯賽就先後擊敗拜仁慕尼黑、RB萊比錫、利華古遜及打和多蒙特，對住排第4嘅慕遜加柏未驚過。

幕遜加柏兩中場缺陣
慕遜加柏上半季表現唔錯，一度進佔聯賽榜首，可惜歇冬後8場聯賽僅得4勝，現已跌出三甲，爭標機會大打折扣。事實上，慕遜加遜個別球員質素平平，只靠整體戰去彌補個人能力不足，踢順境波時可一鼓作氣，但只要狀態及成績下滑，戰鬥力便難以保持，最慘係今場仲有隊長科利安尼奧侯斯坐波監，中場發電機薩卡利亞又因傷提早收咧，失去兩大中場主力可謂雪上加霜。

兩軍近8次交手，法蘭克福喺法定時間之內攞到2勝4和2負，不敗率達75%，而且慕遜加柏今季12場作客聯賽勝出率亦只得5成，殘陣之下冇本錢讓波，法蘭克福下盤好路。