周日凌晨意甲前列對決，拉素主場挑戰衞冕嘅祖雲達斯。意甲班霸祖記今季進攻表現明顯失色，尤其聯賽開局慢熱，呢場面對氣勢正盛嘅拉素更加不敢輕易冒進，料兩軍比賽早段會鬥到難分難解，半場和值博。（myTV Gold 301、Now 638、有線614及654台周日凌晨3時45分直播）

今季意甲冠軍爭持激烈，祖記上輪僅以2比2賽和薩斯索羅後，已將榜首席位拱手讓畀國際米蘭。祖記今季進攻較以往失色，聯賽迄今僅射入25球，係前6列強中鋒力最差嘅球隊，實在令人始料不及。同時，祖記入局極慢嘅情況仍未見有改善，近8場聯賽全部半場都同對手打和，呢場作客，想佔先機嘅難度就更大。

對家拉素近期表現漸入佳境，聯賽取得6連勝，不過拉素近6仗對手嘅實力，都好難同國米、祖記相比，呢場迎來近期最大考驗，預計會先求穩守再謀後動。翻查往績，祖記近3次聯賽造訪拉素半場都打和，呢次兩軍更小心翼翼，半場仲難分勝負，一於吼半場和。