餓波咁耐終於有得玩
今日下午澳職頭場，「2哥」墨爾本城作客包尾大幡中岸水手。水手低處未算低，聯賽9連敗令軍心不穩，加上近年碰頭墨城明顯佔上風，為保住次席攞到下屆亞冠盃入場券，難得遇弱唔會放過搶分良機，客勝不容錯過。（myTV Gold 302、Now 639、有線655及615台周五下午2時30分直播）

水手雖有中場丹尼爾達施華已傷愈復出，而喺2月從珀斯光輝簽入嘅前鋒夏朗特，6次披甲入2球交到貨，可惜成班波積弱多時，自1月中開始，連續9場聯賽輸晒，仲失咗26粒，單計主場已錄得4連敗。主帥史坦斯尼斯亦非一成不變，近期改打3人防線，可惜防守能力未見改善，連場敗陣令球員信心受挫。水手依家得13分排包尾，落後「6哥」西部聯14分兼打多1場，爭入季後賽機會渺茫，冇晒戰意等收咧。

水手防線穿窿等收咧
墨城今季穩居前列，季後賽席位亦幾近到手，但由於常規賽亞軍可取得下屆亞冠盃附加賽資格，依家只領先「3哥」威靈頓鳳凰1分兼打多1場，形勢緊湊，為保「2哥」位鬥心唔使懷疑。除咗射手占美麥卡倫、格力洛尼等中前場主力續有貨交外，1月從大阪飛腳來投嘅前畢爾包隊長馬高蘇沙亞達，喺上次作客贏珀斯光輝亦已開齋，仲有羅斯頓格菲斯及阿祖安隆拿坐完波監復出，今場可排強陣出擊，加上近5次交手，墨城取得3勝1和1負，可繼續食住對手贏波而回。