上足彈藥爭踢季後賽
碩果僅存嘅受注賽事澳職今日上演兩場好戲碼，尾場由珀斯光輝主場鬥西部聯。兩軍目前仍要搶分爭入季後賽，光輝係今季主場聯賽入波最多球隊，從未試過交白卷，對住近2場狂轟11球嘅西部聯，有望合演入球騷，中位數2.5球大盤值得熱捧。（myTV Gold 302、Now 639、有線655及615台周一晚上6時30分直播）

上季常規賽冠軍珀斯光輝現以20戰得31分排聯賽榜第5位，落後榜首FC悉尼17分，衞冕機會名存實亡，佢哋依家比第8位嘅西悉尼流浪者多5分，季後賽資格仲未穩陣，主場出擊唔可以放軟手腳。光輝今季成績下滑，主要原因係後防演出跌晒Watt，上季佢哋全季只失23球，今季踢咗20場已失22球，穩健度大不如前，好在佢哋攻力保持水準，今季9場主場聯賽場場有入波，而且仲係今季澳職主場入波最多球隊，合共轟入22球，有本錢以攻代守。

以攻代守鬥全民皆攻
今季首度亮相澳職嘅西部聯踏入2020年後表現麻麻，頭6場聯賽只得1勝1和4負，不過佢哋近2場先後大炒中岸水手6比2及阿德萊德聯5比1，重燃爭入季後賽希望，如果贏埋今場「6分波」，前途更加一片光明。西部聯陣中除有澳職史上入球王貝利沙及前意大利國腳迪亞文迪掛帥，近2場個人入4球嘅中場麥斯貝基斯、上場交出助攻「帽子戲法」嘅右閘祖舒亞列斯頓亦狀態托弗，現時全民皆攻，承接對上2場大勝餘威，作客唔怕與光輝對攻，今場大細中位數有2.5球，大盤絕對係不二之選。