「護級專家」仁川聯會於主場鬥FC大邱。仁川聯一向是傳統弱旅，遇強即屈，季初例牌腳軟，但每每季尾就可以護級成功，FC大邱上季取得隊史韓職最佳成績，今季更簽入「老江湖」丹恩奴域，如虎添翼，而且近4次碰頭獲3勝1和，客勝好路。

（周六下午3時30分開賽）

仁川聯於2004參戰韓職以嚟，從未降過班，不過佢哋每每場係去到季後賽發力，僅僅護級成功，換句話講，季初嘅常規賽球隊成績非常曳，仁川聯上季頭13場聯賽只贏過1場，前季更加係頭18場聯賽只得1勝。

上季仁川聯位列尾3，帶隊「上岸」嘅主帥柳相鐵患末期胰腺癌離職，新上任嘅林完燮即進行大換血，清洗了26名球員，包括主將金晉亞、朴勇智等，並簽入10多名新兵，磨合需時。仁川聯上季只入33球，係聯賽入波第二少球隊，火力比降班嘅FC慶南及濟州聯仲差，上季18次面對前6球隊更僅得1勝5和12負，遇強隊例必腳軟。

老將丹恩奴域做後備殺手
相反，FC大邱上季殺入爭標組之餘，最終取得第5名，係球隊於韓職最佳成績。FC大邱成功留住巴西鋒線雙星艾格般奴及施仙夏，兩人上季合共攻入26球，係韓職最具殺傷力的前鋒組合之一。此外，FC大邱更從水原藍翼羅致老牌射手丹恩奴域，雖然已經38歲，但呢名喺韓職累積逾百球嘅箭頭老而彌堅，可在後備席隨時候命，加上FC大邱近4次交鋒取得3勝1和，明顯格食格，必捧客勝。