周六晚韓職壓軸戰，FC光州主場硬撼FC城南。FC城南擅於限米煮限飯，上季護級成功有辦你睇，加上近年面對FC光州不落下風，作客亦無懼呢支升班球隊，讓球主客和FC光州讓一球，必捧城南讓球客勝。

（周六晚6時開賽）

FC城南上季升上韓職，喺有限人腳下以聯賽第9名過終站，甩開尾2嘅FC慶南12分，成功保住韓職席位。球隊今季改由金南一掌舵，雖然呢名前南韓國腳冇執教一隊經驗，不過佢曾經喺歐洲及日本球壇搵食，並以助教身份帶領「太極虎」出戰2018年世界盃決賽，有一定台型及經驗。

人腳方面，FC城南今季先後羅致梁東炫、權純亨、伊斯簡迪洛夫及湯美斯拉夫基斯等實力派，前兩者富韓職經驗，克羅地亞借將湯美斯拉夫基斯上季喺立陶宛甲組聯賽轟入22球奪得金靴獎，可望改善城南鋒力不足問題，唔怪得話要改踢進攻足球。

光州鋒力集中易被睇死
FC光州上季韓乙勇奪冠軍、事隔兩季重返韓職。上季包辦球隊一半入球嘅孖寶菲臘比迪蘇沙及韋利安巴保沙依然留隊，實力保持，不過前線太倚賴兩人數胡，易被對手睇死，就算簽入哥斯達黎加前鋒烏連拿，能否即時融入球隊亦成疑問。睇番兩軍近5次碰頭，FC城南獲1勝3和1負，當中最近3次都能先入波，FC光州要讓波風險極大，寧捧受讓嘅FC城南。