浦項慢熱未撻着
周日下晝韓職頭場，浦項制鐵主場鬥釜山偶像。浦項制鐵雖有「韓國麥巴比」宋敏圭助陣，但過於慢熱，近年首輪經常不勝，升班球隊釜山偶像一眾生牯仔潛力無限，團結一致，重返韓職首場誓要爭氣，受讓必捧讓球客勝。（周日下午1時開賽）

曾4奪聯賽冠軍嘅釜山偶像喺2015年降班，經過2次升班附加賽失利後，上季獲得韓乙亞軍，終於喺升班附加賽擊敗死敵FC慶南，事隔5年重返韓職。呢支老牌球隊以年輕球員掛帥，權赫奎、李尚俊、李東俊、金珍圭等均有唔錯實力，李東俊不但喺上季韓乙入13球，更加係今年年頭南韓勇奪U23亞洲盃嘅功臣，配合雲迪仙高、羅姆路施華等外援，攻力不容忽視。

近4季聯賽首輪僅1勝
浦項制鐵係連續兩季聯賽殿軍得主，但呢兩季其實都冇乜爭標機會，上季被榜首雙雄全北汽車及蔚山現代甩開23分，基本上只係陪跑。雖然浦項上季打起兩大新人王，其中20歲前鋒宋敏圭快速兼扭得，被喻為「韓國麥巴比」，可惜另一位新星李秀斌，今季已被全北汽車收回，縱然箭頭伊祖辛高留隊，但佢上季只入9球，表現唔算標青。加埋浦項史上對過釜山150次，只得49勝54和47負，根本冇優勢可言。

浦項制鐵近年開咧成績麻麻地，近4季聯賽首輪賽事僅得1勝1和2負，非常慢熱，加上受疫情影響，球員未能夠好好夾靚戰術，今季K聯賽開咧戰全北汽車有辦你睇，全北擁有韓職最強兵力，都要踢到臨完場先靠死球攻勢入波，浦項制鐵面對升班後雄心壯志嘅釜山偶像，就算有地利亦不宜高估，讓球客勝值得捧場。