今届欧霸嚟到16强首回合，随住些路迪喺上圈被踢出局，苏超遗珠格拉斯哥流浪于今晚主场迎战德甲嘅利华古逊。格流近期接连受挫，主帅谢拉特一度萌生退意，确係影响军心，利华歇冬后愈战愈勇，超新星夏维斯表现光芒四射，作客让波冇有怕，上盘捧得过。
（有线656及616台周五凌晨4时直播）
客军歇冬后12战10胜
格流今季一度有力挑战些路迪于苏超嘅垄断局面，可惜踏入新年后接连失分，已经落后死敌13分，争标机会渺茫，苏足盃又畀赫斯踢出局，搞到主帅谢拉特心灰意冷想劈炮，虽然最终决定留队，但近2仗只得1胜1负，曾经做过球员嘅我，梗係明白季中问题多多，主帅要拨乱反正唔易，所以好理解「谢四」嘅无奈，不过佢依家似乎冇乜计。
利华古逊向来大起大落，颇有「神经刀」特质，幸好踏入季中明显有改善，歇冬后12仗正式比赛，豪取10胜1和1负，包括于上圈欧霸双杀波图。利华主帅保斯崇尚进攻，令阵中攻击球员获得全面释放，保连奴、禾兰、里安拜尼及比拿拉比轮流有货交，最抢眼嘅必属德国超新星夏维斯，「Kai仔」自歇冬后轰6粒兼交出7次助攻，无论打翼锋、进攻中场或客串箭头，都一样有料到，造访近况低迷嘅格流，有力抢先机。
