车仔输经验飘忽兼哑火
今晚英超大战，车路士主场对曼联，两队都要努力为下届欧联入场券而战。车仔小将经过去年10月、11月嘅蜜月期后，状态开始起伏不定，真係要套用赌魔陈金城名句：「后生仔始终係后生仔，都係急啲！」曼联有遇强愈强特性，受让半一捧下盘。
（Now 621及611周二凌晨4时直播）
车路士今季重用新人踢出惊喜，5名22岁以下嘅英格兰小将谭美阿巴谦、美臣蒙特、赫臣奥杜尔、列斯占士及汤姆利火速上位，成为球队主力，季初更打出一段6连胜，势不可当。不过年轻人最大毛病就係水準唔稳定，之后13场联赛仅赢4场，如果唔係其他主要竞争对手频频失分，根本难以保持前4位置。
车仔战绩低沉嘅主要原因，係射手谭美阿巴谦入球率下滑，加上基斯甸普列锡养伤冇咗个好帮手，毕竟后备前锋巴舒亚伊及基奥特喺联赛加埋都只係入咗1球。若果阿巴谦哑火嘅话，车仔嘅进攻可谓顿失支柱，不幸嘅呢位箭头有伤在身，今场仍未确定能否上阵，如倦勤嘅话，对车仔可谓打击甚大。
目前排第9位嘅曼联，距离车仔只係相差6分，由于曼城有可能被禁出席未来两年嘅欧洲赛，如果上诉唔成功嘅话，随时联赛第5都有得踢欧联，对曼联嚟讲绝对係好消息。曼联喺冬季转会窗相当积极，罗致咗士砵亭中场波基斯费南迪斯及尼日利亚前锋恩哈路，虽然两人嘅作用尚待证明，但起码前线嘅调动灵活咗好多，为咗争取出场机会，各人都要更加努力。
红魔12次遇前8仅2负
其实红魔今季对前列球队嘅成绩相当唔错，单计前8名球队，共踢咗12场仅输过2场，强如利物浦今季唯一失分嘅赛事就係喺曼联身上，可见佢哋嘅防反战术係有一定威力，车仔嘅防线今季出现极多漏洞，连天价转会费嘅门将阿列沙巴拿加都因表现太差而失去正选，曼联今仗绝对有机会偷鸡。温馨提示，今晚天气转凉，大家睇波时记得着多件衫啦。
