曼城今次真係「赔了夫人又折兵」！上场联赛曼城凭住对手乌龙球，喺半场领先嘅情况大好形势下，下半场被车路士连入3球，主场以1比3落败，今季首次主场输波；今场惨败，将球队存在已久嘅问题一次过显露晒出嚟。
开季6连胜兼射入18球嘅曼城，前场有阿古路、洛尼图、大衞施华等多名攻击好手在阵，攻击力当然冇大问题，不过睇番过去14场联赛，曼城只係试过两场冇失过波，后防问题一早浮现；可惜哥迪奥拿选将方面一向主张用波为主，好似今季门将岗位就由哥迪奥巴禾代替表现稳定嘅赫特，中坚亦起用技术好但防守力一般嘅史东斯，虽然每场比赛都有较佳嘅控球数据去支持呢种打法，但只限于对中下游球队有用，对住擅长打稳守突击嘅球队，好多时都係「赢点数，输比数」。
曼城今季输嘅两场波，正正就係暂时联赛失球最少嘅车路士同热刺呢两队，就以上场对车路士场波为例，曼城全场有超过6成控球率，角球、射门同传球次数比对手多。从数据上睇，成场比赛曼城明显係佔优嗰队，不过最后输波而回，而佢哋失嘅第2同第3球波，都因为喺前场失控球权之后被对手打反击所致。曼城后防个人能力不足，睇怕哥帅等转会窗重开要有啲搞作，执好条防线至得喇！
