若果讲到近6至7年来，世界球坛最四平八稳嘅阵式，笔者首推「4231」，但无论用乜嘢阵式，中场配备双防中嘅位置尤其关键，此话何解？
以往英超「Big 4」年代，阿仙奴最鼎盛嗰阵不乏韦拉、比堤及基拔图施华等中场铁汉，曼联亦有坚尼、费查及卡域克等悍将，利物浦则有夏文、沙比阿朗素及攻守兼备嘅谢拉特，车路士就有效率极高嘅马基列尼、艾辛同拉美利斯，证明一支顶级球队，需要储备2至3位具级数嘅防中，先可做到「得中场者得天下」，有呢班无名英雄做绿叶，先令前线嘅Super Star亨利、C朗、费兰度托利斯及杜奥巴等发热发亮。
讲番今季，防中依然喺各支英超强队中扮演重要嘅角色。意大利籍教头擅于打3人防线，无论係「343」抑或「352」等阵式都驾驭得宜，车仔主帅干地亦唔例外，自从佢变阵「343」后，球队于联赛豪取7连胜杀上榜首，当大家激讚频有士哥嘅叁叉戟迪亚高哥斯达、夏萨特及柏度洛迪古斯嘅同时，由于选用3人防线关係，双防中尼高路简迪及尼曼查马迪嘅补位协防工作非常重要，特别係尼高路简迪嗰种波到人到满场飞嘅踢法，确保攻守转换嘅流畅。
至于曼联领队莫连奴，近期复用老将卡域克伙拍安达靴里拉，顺便解放咗保罗普巴更多投入进攻，表现渐入佳境，而曼城主帅哥迪奥拿亦放下成见，重新起用老将耶耶托尼，拍住费兰甸奴组成防线前嘅屏障。所以话想做到攻守平衡，设置双防中乃重中之重。今晚英超头场「双蓝会」，「蓝月亮」曼城主场斗「蓝战士」车路士，笔者认为弗到漏嘅客军可坐和望赢。
金句：防守中场启示录，英超数队见真章
