今季英超争持激烈，联赛啱啱完成咗3分1嘅赛事，依家排头几位嘅分别係车路士、利物浦、曼城同阿仙奴几支传统劲旅，几队分数接近，而且已经将分数带开，联赛冠军最多只係加埋热刺同曼联六队之争，「奇兵神话」？今季都应该几难再见到喇！
今季改由莫连奴带领嘅曼联，虽然有伊巴谦莫域同保罗普巴两位球星在阵，但成绩并未符合预期，开季3连胜以为会强势回归咩？点知往后嗰10场联赛都係赢得嗰两场，计埋上场英超1比1逼和韦斯咸，连续4次联赛主场都只能和波收场。
曼联目前只能以20分排喺联赛第六位，暂时落后榜首嘅车路士11分之多，未来一仗作客爱华顿如果再失分的话，联赛差不多可以毕业喇。睇番曼联近2场喺主场嘅赛事，可以用「技高运低」嚟形容，对住阿仙奴场波明显有压倒性嘅优势，可惜喺领先下，被对手临完场追和失分；而上场对韦斯咸，全场有多次具威胁嘅射门，完场前米希达利恩嘅射门如果有运嘅话，中内柱就入咗啦，结果都係失分收场，不过论表现，我认为曼联係绝对值得攞晒呢6分嘅。
