今个周末英超重开，除咗曼联主场迎战阿仙奴呢场瞩目大战之外，榜首嘅利物浦喺联赛嘅走势亦都值得大家留意。
目前喺联赛以8胜2和1负26分排第一位嘅利物浦，自8月20日作客倒灶输畀般尼之后，球队已经叁个月未输过波，连同联赛杯在内，12场比赛录得10胜2和，联赛分别击败阿仙奴、车路士、而对住曼联、热刺等主要竞争对手亦都能保持不败。暂时嚟睇，高普嗰种高强度前场逼抢打法算係几成功！
利物浦依家踢咗11场联赛攻入30球，平均每场入2.7球，成为入球最多嘅球队，阵中几位进攻重心球员菲腊比古天奴、罗拔图法明奴、沙迪奥文尼已经为球队合共射入16球，状态大勇，几位除咗喺球会有货交之外，喺国家队亦都有好表现。「红军」今周作客修咸顿，论近况同实力，3分应该冇乜难度，唯一担心嘅係两位巴西国脚周中仲要作客秘鲁，为国家队出战世界杯外围赛，搭长途机舟车劳顿，休息唔够而影响表现。不过为咗保持联赛榜嘅优势，呢场波「搏埋条命」都要啦！
