狼队起维小心翼翼
2020/08/11文:Mic少

狼队箭头 鲁尔占美尼斯

1/4
一场定生死唔敢冒进
今晚欧霸盃续演2场8强大战，狼队与西维尔喺德国杜伊斯堡交锋，英超代表狼队相隔48年之后，再次打入欧洲赛8强，经验较输蚀，相信佢哋今场唔会太冒进。另边厢西维尔素有「欧霸专家」美誉，但今届表现唔算标青，入球数字亦偏低，建议捧中位数2.5球细。

（myTV Gold 303、Now 643、有线656 及616台周三凌晨3时直播）

狼队上场欧霸盃16强次回合，仅凭前锋鲁尔占美尼斯射入12码，小胜希腊球队奥林比亚高斯1比0，两回合计赢2比1晋级。狼队由7月开始，状态有所回落，各项赛事近7场仅获3胜1和3负，其中3场未能取得入球。不过狼队踢法一向主守，失球亦唔多，所以近12场比赛有11场总入球开2球或以下。

阵容方面，除咗主力后衞庄尼卡斯度提早收咧（见另文），「10号仔」普丹斯亦因黄牌够数，今仗要坐波监。一前一后冇咗个重心人物，以领队纽奴嘅性格，肯定提醒班波踢得更谨慎，先求稳守，再搵机会一剑封喉。

西维尔晋级过程欠霸气
西维尔曾经5夺欧霸盃冠军（连前身欧洲足协盃），係呢项赛事捧盃次数最多球队，不过呢支今季西甲4哥喺今届晋级过程，表现唔算特别出色，其中32强对罗马尼亚球队克卢日，西维尔两回合只能与对手打和1比1及0比0，仅靠作客入球优惠晋级，欠缺王者霸气。

事实西维尔火力一般，已经连续5场欧霸盃开2球或以下，上场欧霸盃16强能够以2比0击败罗马，好大原因係罗马门将包卢比斯严重犯错，并非自己发挥出色。既然今届欧霸盃8强，取消主、客两回合制，改喺中立场一战决胜负，相信狼队与西维尔都会倾向稳守为先，唔想先失波，预料会係一场拉锯战，首选入球细。