曼联猎狐谢幕！
2020/07/26文:法达斯维

曼联红人格连活特

1/2
煞科日爆最激掘金战
今晚英超煞科，10场波同时间上演，当中李斯特城主场对曼联嘅争前4超激战，唔係你死就我亡。「狐狸」防线唔稳阵，焗攻随时输得更惨；曼联今场只要唔输即稳夺欧联入场券，对来季收入极有帮助，加上近年对赛食住对手，让平半捧上盘。（Now 621及611周日晚11时直播）

季中一直稳做3哥嘅李斯特城，踏入下半季大跌Watt，复赛后8仗只得2胜3和3负，不断失分搞到跌落第5，要争前4今仗需主动求胜，若然打和就要望「车仔」另一边输波，形势唔多好。喺射手榜领先嘅占美华迪虽重拾射门鞋，但中场重心占士麦迪臣提早收咧，右闸列卡度彭利拿续抖及中坚苏恩古坐波监，近期防线漏洞百出，前后阵容都不整，焗攻仲牙烟。

「红魔」近7次对赛6胜
曼联上周中虽然打和韦斯咸失分，但因另一争前4劲敌车路士输波，得以升上第3位。「红魔鬼」已经连续13场联赛不败，单计复赛后8仗更豪取5胜3和，自波基斯费南迪斯加盟后，全面激活中前场。佢哋喺英足盃4强畀「车仔」淘汰，眼前目标放晒喺前4嘅欧联入场券身上，疫情重创经济下，呢条大水喉更不容有失。翻查纪录，曼联近7次联赛对「狐狸」获6胜1和，摆明格食格，煞科战唔会再保留，「红魔」个势咁旺咪拗颈，强捧上盘！