全北格食格搵首尔出气

2020/06/04
嚟紧周末韩职大战连场，其中FC首尔主场硬撼全北汽车，全北上轮被终止全胜走势，能保住「1哥」只因蔚山现代唔争气失分，今仗造访实力次一班的首尔，有望及时赢波反弹。

韩职转会窗将于本月25日重开，近期转会消息亦满天飞，原本已同全北解约、1月与中甲球队北京人和跟操嘅老将辛炯旼最终被放弃，几个月冇班落，全北近日伸出援手，双方签约半年，佢擅于做扫荡工作，全北今季中场正正欠缺呢类具经验嘅铁血悍将，今次交易算係双赢。

浦项蔚山「最强之矛」对决
虽然辛炯旼要等转会窗重开后，先可正式披甲，但佢毕竟係全北近4次称霸韩职嘅功臣，其回巢嘅消息亦可激励士气。开咧3连捷嘅全北，上轮有洪正好早段被逐下作客FC江原输0比1，不败身被打破，不过首尔亦唔好得几多，开咧4仗2胜2负，老将太多、进攻组织溷乱问题未改善，加上全北近5次联赛作客首尔赢晒，格食格下有力反弹。

同日另一场大战有东海岸打吡，浦项制铁主场迎战蔚山现代，上月被FC江原放弃嘅吴范锡，以自由身身份重返浦项，当然要喺月尾先可上阵，不过呢位喺浦项青训出身、曾叛投死敌蔚山嘅老将，今次回巢能否重获球迷欢心，仍係未知之数。

讲番场波，蔚山上轮只能逼和弱旅FC光州1比1，未能趁住全北输波重登榜首，今仗打吡更加要搵浦项出气，浦项上轮大炒仁川联4比1，唔单止成为上轮韩职最佳球队，入波兼助攻嘅伊祖辛高及交出两助攻嘅柏路斯域，亦入选上轮韩职最佳阵容，浦项今季已入8粒，仅次于有9球进帐嘅蔚山，今仗属于「最强之矛」对决，势必合演入球骚。