波图宾菲加直路片到尾

2020/06/01

阿历士迪尼斯
波图后衞

1/6
葡超周四凌晨返嚟啦！
欧洲各大联赛陆续重开，今个周中轮到葡超返嚟喇！葡超嘅争标形势同近几季冇乜分别，随住「Big 4」其馀两队布拉加及士砵亭甩辘，今季嘅剧本都係熟口熟面，依然係由「1哥」波图同「2哥」宾菲加两大死敌争逐冠军，双方只差1分，依家剩番10轮赛事，激烈到爆，未去到转弯入直路，真係唔知鹿死谁手。

．双杀死敌波图冲冠佔先机．
虽然宾菲加、波图、士砵亭及布拉加被称为葡超「Big 4」，实际上后两者始终都争啲霸气难成气候，因此近17季葡超冠军，全由波图同宾菲加包办晒，其中波图佔咗10次，稍胜一筹。

波图去夏仍奉行一贯低买高卖嘅政策，将艾达米列达奥高价卖畀皇马，所以开咧后的确唔及宾菲加咁稳定，不过随住喺欧联同欧霸相继出局，令佢哋更加专注争联赛，除咗左闸阿历士迪尼斯意外地省入8粒，成为阵中首席射手外，中场捷西斯哥朗拿更交出7个助攻，趁住宾菲加喺2月突然跌Watt，得以乘虚而入，以1分之差爬头上榜首，可见佢哋喺停摆前状态更胜死对头。

两大「硬嘢」或成拦路虎
虽然宾菲加係联赛入波最多、失波最少嘅球队，但波图手握一大优势，就係佢哋今季联赛两循环「双杀」宾菲加，由于葡超规定，若果同分係先计有关队伍对赛得分，因此波图亦佔咗先机。不过波图亦有隐忧，喺馀下赛程唔及宾菲加咁轻鬆，仲会遇上硬嘢布拉加及士砵亭，难保后两者忽然变身拦路虎，稍有闪失，足以影响波图重夺联赛冠军。

．停摆回气宾菲加追分场场搏．
儘管过去17季葡超冠军，宾菲加比波图少3次，但若果单计6季，「里斯本雄鹰」5度封王，论近年势头远胜波图。宾菲加今季开咧后亦顺风顺水，头19轮联赛豪取18胜1负，气势如虹，点知喺2月突然大走样，先喺次循环对垒再输畀波图，之后4场只得1胜2和1负，令佢哋停摆前畀波图以1分反压而屈居次席，兼且两循环都不敌波图，争标形势急转直下。

宾菲加前线嘅卡路士云尼斯奥斯及碧斯，合共为球队攻入29粒，位居射手榜头两位，难怪宾菲加以52球斩获冠绝葡超，由鲁宾戴亚斯与阿历士基莫度领导嘅防线，24仗联赛只失14粒，成为联赛失球最少球队。

誓重演去季后上封王
由于宾菲加喺对赛方面不及波图，惟有先做好本分，场场都要当决赛咁踢，1分都不能少，再望波图失分，睇番宾菲加馀下赛程都较易踢，直至煞科战先有「里斯本打吡」硬撼士砵亭，查实佢哋上季都靠凌厉后劲，赢晒最后9场联赛，得以压过波图封王，难得喺停摆期间回一回气，宾菲加可以重整旗鼓，只要重演上季季尾嘅疯狂冲刺，话唔定会再创奇迹。