慕逊加柏炸不来梅求翻身

2020/05/26

慕逊加柏为冲前4，今仗唔会放过云达不来梅。

至于5哥慕逊加柏同时间将会作客斗云达不来梅，慕逊加柏上场输畀利华古逊虽败不辱，今场对住联赛主场7连败嘅不来梅係时候打翻身仗；不来梅联赛重开后表现一般，斗强队随时现形，慕逊加柏让半一，都係拣上盘。（Now 670、有线651及611台周三凌晨2时30分直播）

不来梅主场7连败
慕逊加柏联赛停摆后重开2战1胜1负，上场1比3输畀利华古逊，全因对手近况太好，输得唔算难睇。进攻铁三角柏利亚、比列安保路及马古斯杜林今季联赛加埋轰入24球，其中马古斯杜林连续2场有士哥，状态唔错，有望喺积弱嘅不来梅后防线攞得甜头。

云达不来梅上场凭中场比顿确特嘅早段入球，作客1比0险胜弗赖堡，暂以26战得21分排尾2，落后尾4嘅缅恩斯6分，护级形势依然险峻。不来梅上场赢波，全因攻势较多嘅弗赖堡欠缺埋门一脚，加上对方古尔迪完场前嘅入球惨食诈胡，不来梅才得以保住胜果，整体而言，佢哋上场表现唔算十分出色，遇上实力较强嘅球队恐会捱打。不来梅对上7场主场联赛全部输晒，当中近5场全部淨输2球或以上，对手包括利华古逊、多蒙特等前列分子，今斗慕逊加柏相信凶多吉少。