史浩克04执到堡

2020/05/24文:法达斯维

史浩克04箭头古多贝斯托拿

1/3
打吡惨败搵弱旅出气
今晚德甲早场，中游分子史浩克04主场迎战奥格斯堡。「矿工」上仗喺鲁尔区打吡战惨败，只因对手实力太强，今战对住实力差一截兼作客5连败嘅奥格斯堡，绝对係终止联赛8场不胜嘅最佳时机，1.92倍主胜有计。(Now 670、有线651及611台周日晚7时30分直播)

史浩克喺上周联赛重开嘅鲁尔区打吡，竟以0比4大败畀死敌多蒙特，连盃赛在内，已经10场法定时间未赢过，战绩为5和5负，包括联赛8场不胜，对上一场胜仗要数到1月歇冬后首仗主场2比0击败慕逊加柏。不过坦白讲，上仗大败，除咗史浩克未上力外，亦与多蒙特极速入局有关，吸取惨败教训后，今场一定知耻近乎勇，难得遇到弱旅奥格斯堡，「矿工」必趁机破不胜闷局。双方首循环交手，史浩克04作客都赢3比2，返主场更有取胜把握。

奥格斯堡依家只徘徊中下游，比尾3嘅杜塞尔多夫仅多4分，有一定护级压力。但佢哋近况实在太差，上周联赛重开前，先闹出新帅靴列治喺隔离期间违反禁令出去买牙膏，搞到主场对禾夫斯堡冇得督师，最终输1比2之馀，全场都畀禾堡控制战局，中前场个个冇料到，难怪近6场录得1和5负，咁弱鸡真係抢1分都难。

奥格斯堡作客5连败
翻查纪录，奥格斯堡作客表现坚曳，由去年底至今连续5场输波，入得1球及共失14球，见到都唔开胃，而且有基尔化、西蒙艾斯达、安达夏恩及舒希巴因伤倦勤，要喺史浩克身上抢分，只得淼茫同冇机会，仲唔係天助「矿工」，主胜不容错过。