全北汽车抢W破釜沉舟

2020/05/16
韩职周六压轴戏，有升班球队釜山偶像主场迎战衞冕嘅全北汽车。全北喺揭幕战凭李东国一箭定江山，主场险胜水原蓝翼，表现虽未见冠军霸气，不过整体质素仍属高班，造访经验不足嘅釜山，可望以质取胜，客胜值博。

（myTV SUPER周六晚6时直播）

釜山播球迷叫声吓全北
釜山以传控踢法为主，上场迎战浦项制铁空有控球，最后却惨吞两蛋，交出沉重「学费」。睇番佢哋上场派出5个新兵做正选，默契唔够，新兵之一嘅乌兹别克守将杜苏洛夫更两次犯错导致失波，巴西前锋云迪仙高首演亦明显未适应新环境，令表现活跃嘅李东俊经常陷入孤立。釜山攻守皆有问题，踢法上亦需调整跟上韩职节奏，季初表现难寄厚望。

由于闭门作赛，可能釜山自知唔够全北鍊，为咗加强主场气势，将喺今日透过LED公告板，发送官方SNS收到嘅球迷打气短讯，仲会通过喺球场播放虚拟欢呼声，以至球迷呐喊声，希望谷起士气兼吓窒对手。

不过全北作客一啲都唔弱，佢哋上季18场联赛作客仅1败，并且取得10胜7和绝佳成绩。教练莫理斯踢法着重控球及组织，同釜山风格相近，「货比货」下，全北球员经验同质素明显较高，即使作客仍值得睇好。