蔚山尚州大有惊喜


2020/05/09文:笛子波童
李青龙回巢火力再升级
韩职今日续演3场比赛，上届亚军蔚山现代打头阵，主场迎战尚州尚武。蔚山现代上季争标功亏一篑，今季捲土重来继续扩军，决心唔需要怀疑；尚州尚武虽然已笃定降班，不过冇心理包袱随时有惊喜，睇番两军对上5次交手一共合力炮製21个士哥，当中4次开3球或以上，捧中位数2.5球大盘最好路。

（周六下午1时开赛）

蔚山现代上季长时间处于联赛榜三甲位置，可惜煞科日主场倒灶输波，因得球不及全北汽车屈居亚军，输得甚为不值。蔚山现代今季虽有2号射手金甫炅转投全北汽车，不过曾喺荷甲搵食嘅新兵比安庄臣具一定质素，加上老将李青龙回归，配合上季联赛攻入19球嘅首席射手祖利亚尼加奥，进攻能力比去季有过之而无不及。后防方面，2018世盃人气门将赵贤祐由FC大邱加盟，有助稳定后防军心，令整体战斗力更上一层楼。

尚州笃定降班冇包袱
尚州尚武来自南韩军方机构，球员全部都係为国服兵役、年龄皆在28岁或以下，活力、体能係佢哋抢分最大本钱。基于南韩政府明年开始禁止同一城市并存企业球队及军方球队，尚州尚武踢完本季就要「分家」，尚州将自组新军参赛，尚武则须另觅城市作为落脚地，根据赛制规定，两军明年都要由韩乙展开角逐。阵中主力如文善敏、权敬原及柳承佑均具备喺韩职立足嘅个人质素，就算球队笃定降班，为个人前途亦一定博尽，何况球员冇护级压力，放开包袱随时踢得更放，话唔定有意外惊喜。

况且睇埋往绩，尚州尚武近5次对蔚山现代虽然只得1和4负，但只有1次冇入波，4次开3球或以上，战况绝非一面倒，今场最好捧大盘。