德乙升班形势为你拆解

2020/05/14

禾格斯森马比勒费尔德前锋

1/8
刨定资料等5.16重开
除咗德甲之外，德乙同样会喺5月16日重开。虽然榜首比勒费尔德一枝独秀，但紧随其后嘅史特加、汉堡及海登咸，3队只有4分差距，佢哋争取直接升班或升班附加赛资格，争持依然激烈，今日《东方波经》集中火力，分析呢4队嘅争升班形势，为联赛重开做定功课。

比勒费尔德 攻守都掂直升稳胆
比勒费尔德开咧唔算太顺，不过原本带头嘅史特加及汉堡频频失分，造就佢哋后来居上，依家以6分甩开「2哥」史特加，喺榜首领导群雄。

比勒费尔德上次喺德甲亮相，已经係2008/09年度球季嘅事，之后仲衰到跌落德丙，直到2015/16年度球季先升番上德乙。上季季中接手带队护级成功嘅主帅奥侯斯，今季签入贝宁国脚施比奥苏古，全面释放球队攻力，前线三叉戟法比安高路斯、禾格斯森马及施蒙艾蒙臣，合共轰入31球，其中法比安高路斯更以16球排紧射手榜「1哥」，兼交出5个助攻。事实上，呢个箭头过去9季效力比勒费尔德，有7季入球达双位数字，绝对唔嘢小，难怪比军暂以50球成为德乙火力最强球队。

三叉戟坚劲不败率逾9成
比勒费尔德唔单止攻得，喺今季联赛只失24球，係德乙失波最少球队，攻守兼备，25轮联赛只曾两负，不败率逾9成。正因如此，佢哋主、客战绩都几平均，如单计作客联赛，13仗取得8胜4和1负，成绩甚至比主场更好，亦係德乙客场王，呢13仗入面有11次半场冇失波，稳中求胜嘅策略明显奏效。比军剩番9轮有4场作客，最恶啃嗰场係造访争升班劲敌汉堡，但若果佢哋保持稳定水准，要喺联赛封王直接升班嘅机会都几乐观。

史特加 飘忽係最大绊脚石
上季由德甲降班嘅史特加，今季开咧头8仗取得6胜2和，一度高踞榜首，可惜踢法重攻轻守，导致季中连番失分，搞到畀比勒费尔德反超6分，认真差劲。

重攻轻守遇弱冇胜算
史特加锐意捲土重来，今季留住3名前德国国脚马里奥高美斯、卡斯特罗及毕斯杜巴，前中后三线骨干犹在，亦係佢哋开咧带出嘅原因。值得一提嘅係，史特加主场特醒，13场联赛主场取得10胜1和2负，共轰27球，係停摆前主场成绩最好嘅球队，可惜呢班波衰在唔稳定，经过强势开局后，竟然喺停摆前17仗赢得7场，其中面对汉诺威、辛特侯逊、韦恩、奥斯纳贝克等弱旅都失分，表现咁飘忽，成为争标最大绊脚石。呢支联赛「2哥」嘅馀下赛程中，仲有主场对汉堡嘅关键战，史特加应该专心保住亚军嘅「直升」资格，方为上策。

汉堡 客场失分重灾区
汉堡前季首度由德甲降落德乙，上季又喺大好形势忽然跌Watt，连升班附加赛资格都抢唔到，满以为佢哋今季痛定思痛，点知又係重蹈覆辙，令人失望。

未来硬仗连场
汉堡除咗保留肯特、柏柏杜普路斯等主力外，更签入轩达斯亚、桑尼杰图及夏历，3人至今喺联赛共入22粒，实力有增无减，开咧12场联赛取得7胜4和1负，一度压过史特加升上榜首。

不过呢支老牌劲旅作客麻麻致失分频频，佢哋擅于主场抢分，停摆前12场主场联赛取得9胜1和2负，主场成绩仅次于史特加。但相比之下，今季13场作客联赛赢得3场咁大把，客场胜率只得23％，亦係佢哋季中不断失分嘅「重灾区」，嚟紧仲要造访史特加、海登咸、格雷特霍夫等前列分子，继续咁样主强客弱，随时连「3哥」嘅升班附加赛资格都保唔住。

海登咸 防守稳健有惊喜
「4哥」海登咸经过出闸脱脚后渐入佳境，倚靠出色嘅防守，而且趁住史特加、汉堡不断失分，一步一步咁杀上前列位置，令佢哋争取升班嘅梦想，不再遥不可及。

海登咸自2014/15年度升上德乙后，表现平稳，上季34场联赛失45球，係失波第三少球队，最终只落后季军柏林联2分排第5位，失去升班附加赛资格。

最叻初段玩拉布
今季海登咸保留大部分主力，并且买断之前两季表现不俗嘅前锋基连甸斯特，呢位土炮射手今季有12粒进帐，喺两大守将奥利华侯辛、霍伦巴治加盟后，进一步巩固防线，停摆前25场联赛只失26粒，仅次于榜首比勒费尔德，成为失波第二少球队。

睇番海登咸最叻係初段玩拉布，25场联赛当中，有14次开半场和，最终取得6胜6和2负。呢班波现时只係落后汉堡、史特加3分及4分，唔好话争踢升班附加赛，甚至抢埋亚军「直升」都有机会呀！